你肯唔肯定，有人愛你？（下）
上集：https://bit.ly/2Uko4k0
大偉Send咗一條Link畀我，係「生存交易網」。
政府同全球最大嘅購物平台合作，臨時建立呢個網站，畀無親無故嘅人，賣出自己手上嘅生存機會。
雙方實名認證，買家先付款，網站會暫時扣起資金，直到大清洗發生而買家存活，賣家先可以收到錢。
與此同時，如果賣家承諾填買家嘅資料，但清洗後買家死亡，賣家將要負上嚴重嘅刑事責任。
可以話，呢個網站喺最大程度上，保障咗買賣雙方。
好多人做賣家，但價錢依然居高不下。
據講係因為有好多有錢人，為咗確保有人填佢個名，不惜購買多於一個名額，所以價格不斷被推高。
我雖然好想買一個名額嚟保障自己，但我邊有咁多錢？
大偉就講：「咁我都冇辦法啦。」
我都明白，作為朋友，佢幫我分析情況、Send埋條Link畀我，已經係仁至義盡。
我諗咗一晚，都諗唔到解決方法。
我冇可能同心心講：「我唔信你阿媽，不如我哋兩個互填，等你阿媽去死啦。」
至於其他朋友，一般都同屋企人有約定，就算佢哋想幫我，佢哋嘅屋企人都唔會畀我加入。
我唯有用最委婉嘅言辭，向心心講出我嘅擔憂。
心心都答得爽快：「咁你信得過我啦掛，一係掉轉次序，我填你，你填我阿媽，我阿媽填我。」
無可否認，呢個的確係最令我放心嘅方法。
心媽好唔放心，喺心心嘅哀求下，先勉強答應呢個計劃。
但係，心媽打電話畀我，講咗好多難聽嘅說話，話如果佢死咗，心心肯定會嬲我一世；
我又窮又醜，冇咗心心，再都搵唔到女友……
我按捺住心中嘅怒火，低聲下氣哄心媽。
收線之後，我愈諗愈不忿，就係因為我窮，連交換一個生存嘅機會，都好似要人施捨咁。
如果我有錢有樓，心媽仲會咁對我咩？佢肯定會好順攤咁執行計劃，保住我呢個金龜婿。
諗到呢度，我再次打開「生存交易網」。
我發誓，我嘅初衷只係八卦，想睇吓現時嘅名額值幾錢。
但當我見到，一個名額嘅價錢，已經升到足夠Full-pay一層樓，我個心忽然跳得好快。
如果我賣咗我個名額，心媽會死，心心會同我分手，會嬲我一世。
但我有層樓揸手，我總會搵到新嘅女友，多數唔會再被岳母嫌棄。
而且我仲可以租層樓畀人，自己租劏房住，然後辭職進修。
或者我唔Full-pay，而係畀咗首期先，剩番嘅錢拎去投資、做生意……
總之，有咗呢筆錢，我嘅人生就有無限可能，唔駛再忍住怒火，應付麻煩嘅客人、上司、未來岳母。
退一步講，如果我唔賣呢個名額，填咗心媽個名，我哋三個都逃過一劫。
但係，心媽會因為我係一個「有信用嘅人」，而接受我做佢女婿咩？
心媽會繼續嫌棄我，逼心心同我分手。
心心一向孝順，佢真係會繼續同我一齊？
以上嘅論據都係廢話，當一個人有咗決定，佢總會有千萬個理由，去令佢嘅決定顯得合理。
我心底好清楚，我呢個諗法無比卑劣，我打算用咗心心嘅名額，變相害死佢阿媽。
但卑劣嘅諗法，往往無比誘人。
我望吓「生存交易網」嘅賣家人數，依然不斷上升。
其實，真係有咁多人無親無故？即使無親無故，難道唔需要同其他人交換名額？
你估，咁多個賣家當中，又有幾多個係應承咗親人朋友，會填佢哋個名，事實上偷偷拎個名額去賣？
我，只係其中一個。
我將名額擺上「生存交易網」，好快就被人買咗，我收到買家嘅資料。
冇幾耐，大清洗嘅日子就到啦。
我已經度好腹稿，諗緊點同心心道歉，雖然我知道講咩都冇用。
我都已經搜集好資料，諗定要買邊區嘅樓。
我腦裡再次響起嗰把聲：「請填寫你希望生存嘅對象。」
我即刻填咗買家嘅資料。
過咗一陣，把聲話：「五、四、三、二、一……對唔住，冇人填寫你嘅資料，十秒後，你將會被消滅。」
我好慌張，我張大嘴巴想呼救，但發唔出聲音。
點解心心冇填我個名？唔通佢俾阿媽說服咗，結果佢兩個互填？點解佢唔話畀我知？
我心裡有無數個疑問，但已經冇機會問。
但即使我有機會問，唔通我可以理直氣壯咁問出口咩？畢竟，我都冇填心媽個名。
喺金錢同生死面前，感情同承諾，有時不堪一擊。
我忽然意識到，世界上最珍貴嘅嘢，唔係樓、唔係錢，
而係面對呢種情況，佢會毫不猶豫地填你個名，唔會受到任何誘惑嘅人。
可惜，我冇。
－完－
將專頁設定為「搶先看」/ "See first"，最新故仔馬上睇！
我老公養咗條蛇：https://goo.gl/ZroifF
宿世蚊緣：http://bit.do/eSbbZ
#短故 #短篇 #小說 #陳美濤 #廣東話 #粵語 #tomatochan #你肯唔肯定有人愛你
Search